V

Valo - Joulu ossuu vuojen pimeimphän aikhan, ja se tuopi kyllä kerrasta valon mielhenki. Jotenki koko talven kestää paremin, ko tämmönen ilon ja valon juhla pätkäsee kaikhin kylmimän ja synkimän ajan. Mie en perusta kylmästä ja talvesta ollenkhan, mutta joulu on kyllä sommaa aikaa. Minusta solis hauska, jos vois kulkea lipposilla vaikka koko talven. Täälä etelässä ei ole aina ees maa valkosenna tähän aikhan, mutta minua ei se kyllä vaivaa. Mie piän, että joulu ja sen valo on ihmisen sisälä. Ja voipiihan kartiinit laittaa kiini, jos ei halua kattoa 'mustaa' maata, joka kuitenki oikeasti pakkaa olemhan enempiki vihreä. Nykhän ei ole lunta, mutta säätieotuksissa povathan maholisesti pikkusen sitä satavan tännekki ennen joulua. Valaseehan se tietenki maisemaa.

Talvipäivän seisauksen jälkhen alkaa päiväki taas pitenemhän, ja sitäki jokku juhlivat. Mieki ootan innola kevättä, ja toivon, että se rukattas vauhilla tulemhan.

 

Valkoinen - Valkonen son minun joulun väri. Sen kansa ruukaan laittaa maustheksi kullanväriä, ja son siinä. Kaikki liinat, verhot, astiat ja kukakki saavat olla mieluten valkosia. Minule valkoset kukat on aina olhet lempikukkia, kasvavappa net sitte sisällä tai ulkona. Tänä jouluna mullon valkosia amarylliksiä, monta. Olen leikkonu niistä kukkavarsia maljakhonki. Niisson sitä jotaki. <3

 

Vihreä - Havuvvihreä son sopeva jouluväri kans. Se tuopi mielhen mettän, jonka ainaki mie pystyn mielessäni ihan haistamhan, sillälailla niinku nykysin sanothan, virtuaalisesti. Vihriän kans soppii hyvin valkonenki yhthen, ja jos mulla olis kuusi pirtissä jouluna, laittasin siihen vain läpinäkyviä kirkhaita lasikoristheita ja pikkusen jotaki valkosta, että se vihriäinen kuusi itte sais kuitenki olla pääosassa.

 

Väylänvartiset - Tiiän jo etukäthen, että Veispookissa olemishen kulluu paljo aikaa joulunaki. Väylänvartiset-porukassa son semmosta kotosta praatailua vaikka yökauet, jos niin haluaa ja vain jaksaa. Siihen jääpi koukhun, ja ku herrää kattomhan kelloa, sonki jo aina monta tiimaa enemän ko olis arvannu. Väylänvartisistahan mulle tuli mielhenki kirjottaa tämän päivän luukkuki tällälailla omala murtheela. Muutenki son soma tämä nettimailma, ko täältä löyty niin entiset koulukaverik´ko naapurikki. Väylänvartisissa kokkointuu kotosa porukka; ihan ko met kaikki olisimma tuttuja keskenämmä, vaikka oikeasti ei oltaskhan kuunna päivänä naamatusten nähty. Met olema kolunhet jo mielestämmä melkhein kaikki sanat, ja niiton kerätty sanakirjhan, ja siltikki omia sanoja pompsahtaa jostaki syövereistä lissää ja lissää. Oma murrekki on tullu takasi ja vahviintunnu. Tä´mon niinko leirivalkea, jonka ympärillä met praataama.

Vanhat penska-aikaset sanat pulpahtavvat yks toisensa jälkhen mielhen, ja nytte tullee kuunneltua tarkemin omien vanhempiensakki praatailuita. - Sitä vishin alkaa tulla vanhaksi ko nämät 'omat juuret' on tulhet näin tärkeiksi. Onneks olen saannu viime aikona käyä monasti kotipuolessaki kuulemassa ja kuuntelemassa. Muistilaphuin tullee joka reisussa lissää sanoja, jokka on kuullu. Sitte pittää tarkastaa joko non sanakirjassa. - Son tosisti rikas ja rakas tämä meijän murre! Ruottin- tai saamenkielestähän son moniki sana alkujhan lähteny muuntaantumhan meijänperäläisten suuhun, mutta on meilä silti ihan ikiomia sanojaki.

Muuten: Olispa se soma saaha tietää, onko kukhan väylänvartinen käynny aikasemmin tai nyt täälä tätä joulukalenteria lukasemassa. Kyllä rohki saapi panna puumerkkinsä vaikka nimettömänä, kommenttiloothan - niin ei tartte ujostella. Mie ainaki tulisin siittä tosi iloseksi. <3

- Hyvvää joulunootusta Teille jokhaiselle!

 

Musiikkia:

Varpunen jouluaamuna - Vesa-Matti Loiri

White Christmas - Vera Lynn